سلاملار سایین زیارتچی لر

ایندی لاب یالقیز قالمیش بیری یم

سیزه آچیقلاییم:

* 16 یاشیندا اولان قیزیلا آرامیز آرتیق پوزولوب( بیر جوره پوزولدو) یانی آخیر قبول ائله دی کی بیزیم کی جور گلمه یه جک دیر

* آرتیق بئکار دئییلم، بیر ایش تاپمیشام( اؤزومده هئچ اینانمیرام، دئییرم بو گون ساباح منی اؤتورجکلر ائشییه)

* نت یولداشیملا گئدیب گؤروشدوک، آنجاق بیر قرارا یئتیشمه دیک!!!!!

* چوخ زاماندیر فاتیح قیسسا بارماغی دینلیرم

گئجه بوردا سونا چاتدی، سحر آچیلدی و چوخ دوغال اولاراق بو وئب صحیفه سی ده بیتدی حایاتیمدا یئنی بیر بؤلوم آچیلاراق گئجه لیک دن قورتولدوم. بلکه گلن وئب صحیفه مین آدی سحر یا گوندوز یا آخشام یا دا اؤلوم اولدو. هانسی اولاجاق بیلمیرم. تکجه بونو یاخجی بیلیرم گئجه منیم اوچون آرتیق بیتیب دیر. گئجه ده یازدیغیم آنی لار بوردا یاشایاجاقدیر. نه بیلیم، سونسوزا قدر ده یاشیا بیلر. قاباقجالار بئله دوشونردیم کی من عؤمور بویو گئجه لیکده قالاجاغام، اؤلسم ده او دونیادا یئنه گئجه لیکده قالاجاغام. گؤرسن اؤلندن سونرا دا، وئب صحیفه سینه بیر شی لر آرتیرماق اولارمی؟؟ اولسایدی چوخ بتر اولاردی. ایندی کی دورومومو هئچ اؤزوم اوچونده یاخجی آچیقلایا بیلمیرم. تکجه بونو بیلیرم کی یئنی دئییشیک لر منده اوز وئریب. اسکی آدام دئییلم آرتیق. بو وئب صحیفه دن ده، بیر یولداش اؤزوم اوچون تاپمیشام. بوندان منه قالان ائله بو یولداش اولوب. یازیلاریمی اوخویان دا ائله اؤزو اولوب. سون گونلرده بو یولداشیملا ایلگی لریمیز بیر آز چوخالیب دیر. زنگ آچیریق، میساژ یازیریق، دانیشیریق، دئییب گولوروک( من چوخ گولورم) چوخ گؤزل گونلر یاشییریق. من اونا سؤز وئرمیشم گئدیب اونو تاپیب گؤرم. اونو گؤرمه ییمه او قدر امین دئییلم. آما چوخ آرزولاییرام گؤروم. قاباقجالار بیر قیزینان دانیشماق منه چوخ هیجان دوغا بیلردی. ایستیرم بو سون یازیلاریمدا بو گونه کیمی هانسی قیزلار ایله نئجه داورانمیشام ، اعتیراف ائله یم. اوشاقلیقیدا چوخلو اوغلانلار کیمی قونشو قیزلارینی، قوهوم قیزلارینی قوناق باجی اوینایاندا، دؤحتور، دؤحتور اوینایاندا بیر کیشی کیمی اؤپموشم. هردن ده گیزلین یئرلرده، عاییب یئرلرینه باخیب و پیس ایشده گؤرموشم. ایندی اونلاری گؤرنده نه منیم یادیما بیر زاد گلر نه اونلارین.( مندن سورشسان هئچ اوتانمالی دئییل وچوخ دوغال بیر زاد دی) او زامانلار اوغلان قیز علاقه لرینی بیلمزدیک. تکجه س ک س ین اداسینی چیخارداردیق. بؤیودوکجه و بیر شئی لر آنلادیقجا بیر بیریمیزدن اوتاندیق و اوزاقلاشدیق. سونرا یئتیشدیم یئنی یئتمه( نو جوانلیق) گونلریمه. اینانماسیز من چوخ مذهبچی و دینچی اولدوم. حتی حاضیر اولمازدیم بیر قیزین اوزونه ده باخام. آما محبتی نه گؤرموسن؟؟ آدامی اؤزونه قول ائده بیلر. بیر نفر گیردی حیاتیما، اینام دیرح لریمی تپیح له دی. من سئودیم اونو اودا منی سئودی. اونونلا منیم آرامدا نه لر گئچدی قالسین ائله اؤز باشیمدا، اونلاری اعتیراف ائله مرم کیمسه یه. قالسین او دونیادا اعتیراف ائدرم. تکجه بونو بیلین کی بیزیم کی توتمادی( توتا بیلمزدی ده نه اوندا نه منده گوناه یوخ ایدی) آما ایلگیلمیز کسیلسه ده، هله ده او سئوگی منیم اورییمده یاشاماقدادیر و ایندیه قدر بیر قیزی سئوه بیلمه میشم. بیلیم یوردونا گئتدیم. هئچ بیر قیزی سئوه بیلمه دیم. آما قیزلاردان منی سئون اولدو. من اؤزومو اونلارین سئوگیلرینه لاییق گؤرمه دیم. ایلک دؤنه بیر تبریزلی و چوخ غرورلو قیز منی سئودیینی بیلدیم. اؤزو آچیقجا دئمه میشدی آما چوخ زادی دیل دوداق دئمز، بیر گون دانشگاه( اردبیل) طرفیندن تبریزین پالایشگاهینا گئتمیشدیق. قاییداندا من اوشاقلارینان گئری دؤنمه دیم و گئتدیم ائویمیزه. ( بیزیم ائو تبریزین یاخینلیغیندا اولان بیر شهرده دیر) نئچه گون سونرا بیلیم یوردونا قاییتدیم. بیر بنابلی یولداشیم وار ایدی. دئدی سن گئتدین. بیز ده قاباقجادان معلوم اولان برنامه اوزوندن شاه گؤلونه گئتدیک. بیر زامان بو قیز، آناسی و باجیسیلا گلدیلر شاه گؤلونه، اوشاقلارین یانینا. شیرنی گتیرمیشدیلر. بنابلی اوغلان دئییردی، او قیز گلدی مندن سوروشدو کی سن هارداسان و من دئدیم گئدمیسن ائوینیزه. او مغرور قیزین گؤزلری اینانیلمازجاسینا بیردن دولدو و قاییتدی آناسینی یانینا. فیکر ائلیرم آغلیردی. منده اونو سئوه بیلمه دیم.... سونرا بیر تالشلی قیز منی سئودی، سئودیینی ده دئدی. مندن اؤترو تورکجه نی یاخشی جا اؤیرنمیشدی. یادیما گلیر بیر گون مندن ایکی یاش بؤیوک قارداشیم بیلیم یوردونا، منیم یانیما قوناق گلمیشدی. بیر گون بو قیز قارداشیمی شاما ائشیکده آش ایچمک اوچون دعوت ائله میشدی. منیم آشیما چؤرک دوغراییردی. قاشیغینان آغزیما قویوردو. لاب دلی اولموشدو. من ده داداشیمین یانیندا چوخ اوتانیردیم. داداشیم گئدنده منه دئدی او قیزا نه ائله میسن بئله دلی اولوب سنه؟؟ آما من اؤزومو اونون سئوگیسینه لاییق گؤرمه دیم. کاش منده اونو سئوه بیلیدیم. کاش .... بیر گئجه بیر فارس قیز یاتاخ خانادا زنگ آچیب و منی چاغیردی. من بیلیم یوردوندا تانینمیش بیر اؤیرنجی ایدیم. من پان تورک تانیناردیم. منه دئدی سنه بیر فارس قیز سئویر دئسه سئوگیسینی فارس اولماغینا گؤره رد ائله مه سن؟ من ده ایسته مه دیم اؤزومو چوخ سویچو( نژاد پرست) گؤرسدم یالاندان دئدیم یوخ. اودا بیلدی یالان دئییرم . آما هئچ زامان اونو گؤرمه دیم. بیر گون یولداشلاریمدان بیری بیر دسته قیزل گول گتیردی و وئردی منه، دئدی بو گوللری سنی چوخ سئون بیر قیز یوللویوب. چوخ اصرار ائله مه دیم بیلم او قیز کیم ایدی. بیلیم یوردو بیتدی. کنکورو یاخجی وئرمیشدیم. یایدا کیلاسیم اولاردی. نئچه ده نه قیز وار ایدی کاردانی اوخوموشدولار و ایستیردیلر کارشناسی کنکورو وئرسنلر. اونلارا ریاضیات دئیردیم. اونلارین بیری ده لاب دلی اولموشدو. بیر گون دوربین گتیرمیشدی کیلاسا و مندن ایسته دی بیر لیکده بیر رسیم چکتیرک. من ده راضی چیلیق ورئمه دیم. او منه دئییردی کورکن لری چوخ بؤیوک آدامدی و تاپشیرسا، اونا منه یاخجی بیر ایش تاپار... درس بیتدی و منیم له اونون ایلگیمیز بیتدی. یوکسک لیسانس اوخوماق اوچون بیلیم یوردونا قاییتدیم. اوردا دا بیر دزفوللو قیزلا علاقه میز اولدو. او چوخ ایشی دوز قیز ایدی. منه ماجرالارین تعریفلردی. اینانماسیز بیر یول منه بیر اوغلانلا نئجه اؤپوشدوک لرینی تعریف لیردی. او منی سئومه دی، منده هئچ سئومه دیم. تکجه بیر دوست کیمی ایدیک. ایندی او ائولنب و ایلگیلریمیز ده قیریلیب. آما چوخ دوزلو قیز ایدی. بیلیم یوردوندا چوخ ایش سیز و درس سیز اولدوغوما گؤره نت دونیاسیندا چوخ اولاردیم. کلوبدا ائله همن ایل اؤیه( عضو) اولدوم. اؤیه اولدوم و دوغرودان وورولدوم بیر قیزا. او قیز دا چوخ دوشونجه لی و تورکچو بیر قیز ایدی. هله او گونلر موبایل بئله اوجوز اولمامیشدی کی هامیدا اولسون. و منیم له اونون دانیشیقلاری ائله یاهو مسنجرده اولدو. بیلیرسیز بیر گون بیلدیم او اوغلان ایمیش و قیز آدینان چالیشیردی. چوخ دلی اولدوم. نت دونیاسیندا بیر آیری قیز اینان دا تانیش اولدوم. آما اودا ائله منی سریدی گئتدی. داها نت دونیاسینا اینانمادیم. من بئله دوشوندوم کی نت دونیاسینین یولداشلیقلاری ائله نت دونیاسیندا قالمالی دیر و گوونمک اولماز او دوستلوقلارا. بیز قیزینان دا هردن دانیشاردیق. بو قیز اؤزونو چوخ دینلی ایمانلی گؤرسدردی. ائله بیزیم شهرده یاشایاردی. درسمی سون ایلینده بیر موبایل آلا بیلدیم. یایدا گلمیشدیم ائوه، دئدیغیم کیمی کیلاسیم اولاردی. بو قیز منه دئدی نئجه درس اوخوماغی اونا دئیم. خلاصه بیر گون گلدی آموزشگاه دا کیلاسا. بیلیمرم نیه من بیر آز قورخوردوم. من دانیشیردیم آما ائله بیل او قولاق آسمیردی. آغزینا دا بیر ساققیز سالمیشدی و چینیردی. من اونا بیر برنامه لر یازیردیم کاغاذا. اونلاری گؤرمک اوچون گلدی دوردو باشیم اوستونده. من چوخ پیس احساسم وار ایدی. هر کس بیردن کیلاسا گیرسیدی و اونو منیم باشیم اوسته بو قدر یاخین اولدوغونو گؤرسیدی حتما فیکیر ائلردی بیز بیر ایشلر گؤروروک. بیر آزدان سونرا گؤردوم چوخ یاخینلاشدی منه، ائله کی قیچلاری سورتوشوردو اوستومه. منی تحریک ائلیردی، آما من قورخموشدوم و تحریک اولموردوم. او آرتیق دلی اولموشدو. سانکی ایستیردی اوتورسون قوجاغیما. من بو ایشین قاباغین آلماق اوچون دوردوم آیاغا. بیردن جومدو اوستومه و منی قوجاقلادی. و باشلادی اؤپمه یه.منده فقط بونا فیکیرلشیردیم کی نئجه کیلاسدان قویم قایچم. اودا ال چکمیردی. دیلیمی آلمیشدی آغزینا و سوروردو..... آخیر بیر جوره آرالاشدیق و یاخجی هله هئش کیم بیلمه دی....هله نه قدر سورالار زنگ آچیردی و منه سئودیغیندان دانیشیردی. آغلیردی....... ایندی ده کی وار قیرلادان قورخارام... پایان نامه یازان گونلریم چوخ پولا احتیاجیم وار ایدی. کیلاسلاریم چوخالمیشدی. بیر قیزا چوخ درس دئیردیم. آز آز گؤروردوم داورانیشی منیمله چوخ فرق ائلیب. اودا منله یاخینلاشماق فیکرینده یدی.. . بیر گون منه دئدی کی اول گوندن منی سئومیشدی و کیلاسلارا یالاندان گلیردی. منه ائولنمه یی تکلیف ائله دی. من ده یوخ دئدیم. هله اینانمادی و کیلاسلارا بئله گلیردی. منده پول آلیب درس دئییردیم. هئچ خیالیمدا یوخ ایدی. بیر گون منه زنگ آچدی دئدی کی اونا ائلچی گلیب و منه سوروشدو نه ایش گؤروم. من دئدیم اگر سئویرسن هن دئنه. او دئدی من تکجه سنی سئویرم. منده دئدیم سن منی سئوسن ده من سنینله ائلنمه یه جم. آغلادی و داها کیلاسلارا گلمه دی. بیر گون زنگ آچیب دئدی ائوله نیب دیر. بیر آیری گون زنگ آچدی دئدی ایستیرم کیلاسلارا یئنه گلم. من دا قورخموشدوم. دئدیم داها درس دئمه یه واقتیم یوخدو. تلفون نومرامی دئییشدیم. نئچه ده نه کیتابیمدا اونون یانیندا قالیب دیر. سون گونلریمده بیر قیزا 16 یاشیندا یانی مندن 11یاش خیردا ، درس دئیردیم. هئچ اینانمازدیم اونون دا باشیندا بیر فیکیرلر اولسون. بیر گون منه میساژ یازدی کی منی سئویر. لاب ایمتاحانلار واقتی. من دئدیم سن حله ایمتاحانلارینی وئر سونرا دانیشاریق. اصلینده ایسته میردیم فیکرینی قاتیب و درسلرینده آز نومرا آلسین. گؤردوم چوخ هیجانلی دیر و یوخ دئسم چوخ احتیمال درسلرینده دوشه. اخی من بونو یاخجی بیلیرم بیر 16 یاشیندا قیزین سئوگیسی نه قدر گوجلو اولا بیلر.( آخی دئدیغیم کیمی هله منه 16 یاشیمدا اولان سئوگیمدن اوره ییمده ایزلر گؤرورم ایندی) دئدیم یاخجی. توتاغین من ده سنی سئویرم آما سن مندن چوخ بالاجا اولدوغونا گؤره گرک آتا آنان دا بو ایشه راضی اولا. سن ایمتحانلارینی وئر. سونرادانیشاریق. گؤزوز یامان گؤرمه سین، دئدی منیم آنام سنی چوخ ایستیر و یوخ دئمز.آخشام باشی او قیز دئدی آنام سنه زنگ آچاجاق. منیم باغریم چاتدادی. موبایلیمه زنگ ووردو من گؤتورمه دیم . قالمیشدیم لاب دار یئرده. آخی من آناسینا نه دئییم؟ قیز مساژ یازدی آنام زنگ وورور نیه گؤتورمورسن؟ منده بهانه ائله ییب دئدیم بیلمه دیم آنان دی. یئه آناسی زنگ ووروب و منه دئدی بیر یئرده قرار وئر دانیشاق. آز قالیردی دا باغریم چاتلیا. دئدیم نه اولوب آخی؟ نیه گرک دانیشاق. دئدی سنه بیر تؤحفه آلمیشام قابیل بیلسن. وای ائله ایشه قالمیشدیم کی گل گؤرسن. آخیر بیر ساعات معین ائله ییب و تلفونو باغلادیم. قالمیشدیم یئر و گؤیون آراسیندا، بئله ایش باشما هئچ گلمه میشدی. آخیر گئدیب اؤز آناما نئجه اولدوغونو دئدیم. آنام دئدی گئت آل، آما گؤزله. منده گئتدیم بیر کؤینک آلمیشدی. چوخ تعارف دان سونرا آلیب و تشکور ائدیب و گلدیم ائوه، ائله بیل آناسی منی قورخماغیمی گؤروب و قیزینا گؤره بیر سؤز منه دئمه دی و ائله گؤرستدی کی هئچ نه بیلمیر و کؤینه یی تکجه بونا خاطیر کی قیزینا زحمت چکیب درس دئمیشم آلیبدی. ایندی دورموشام ایمتحانلار قورتولسون و سونرا او قیزا دئیم کی من سنی هئچ سئورمیم و ائولنمک ده ایسته میرم. بیلمیرم ایندی بو ایشین آخیری نه اولاجاق دیر. الله خیر ائله سین. بودا منیم بوگونه دک اعتیرافلاریم. گئجه ائله بوردا بیتدی. منده گئدیرم یاتام و گئجه نی ده بوردا قورتاریرام. یاخین گلجکده یئنی وئبلوق آچاجاغام.

27 یاشیم وار. یانی 27 یاشیم قورتاریب و گیرمیشم 28 یاشا.

بوراجان تکجه درس اوخوموشام و عینی زاماندا دا اوشاقلیقدان ایشله میشم ده. ایندی یوکسک لیسانسیم وار اؤزوده یاخجی بیر مهندسی ریشته ده( مهندسی شیمی) معدلیم ده 18 دن چوخدو. 3 دانا ایختراع واریمدی. دوزدو ثبته یئتیرمه میشم ( بیلیرم یئتیرسم ده حالیما چوخ فرق ائله مه یه جک تکجه بیر آز منه خرج آچاجاق) آما هر زامان ایسته سم بو ایشی ده گؤره بیلرم.

اوجا بوی اولماسام دا آلچاق دئییلم.180 سانتیم بویومدو. آریق دئییلم، کوک ده حساب اولونمورام. ایندیه دک ورزش آدلی بیر چالیشماقیم اولمویوب( سون گونلرده نئچه دؤنه گؤل ده اوزمک اوچون گئدمیشم و آز آز اوزمک اؤیرنیرم) . آما بونو دا دئییم کی بو گون قزئتلرین بیرینده اوخودوم کی گولمک ورزش کیمی بیر ایش دیر و اندروفن هورمونونون ترشوحونا باعیث اولار. یانی من چوخ گولرم. چوخ گولمه ییم ده یاشامیم فیکیرسیز و دردسیز اولدوغونا گؤره دئییل.

ایندی عسگرم. شانسیم گتیریب بیر دایره ده عسگرلیغیمی سورورم کی نیظامی بیر یئر دئییل، یانی مجبور دئییلم کی نیظامی پالتار گئییب دولانام. آللها شوکورلر.

باشیمداکی فیکیرلردن سیزه دانیشیم. هر بیر گئنج اوغلان کیمی بو گونه دک جینس سل غریزه لریمین باشینی بیر جوره ازمیشم. بوندان بئله ده ازه بیلرم. آما منیم الیمده دئییل کی، بو طبیعتین بیر قایداسی دیر هامی ائولنمه لی دیر. آما بو راحاتچیلیغا دئییل کی.

بو ایشی چتینلشدیرن چوخلو پرابلم لر وار.

بیری بو کی منیم اصلا پولوم یوخدو کی هئچ، هله بیر چوخ دا بورجوم وار.ایکینجی سی بو کی منیم قالماغا یئریم آتامین ائوی دیر. اورادا اوقدر گئنیش دئییل کی اوردا بیر آیری عاییله ده یاشاسین. اوچونحو بو کی منیم ایشیم ده یوخدو. دولت طرفیندن ده گؤزوم سو ایچمیر بیر ایش اله گئچیره بیلم( ائله بیر قارا پرونده واریمدی کی گل گؤرسن، یانی منی، دولت پان تورک و تجزیه چی بیلیر).

یانی اییندی لوت دن ده لوتم. بیلمیرم یاخجی گونلر یولومو گؤزلویور یا یوخ. تانیشلار، یولداشلار منی چوخ یئتنک لی( ایستیعدادلی) بیلیرلر.

ایندی ایشیم فقط بودو کی عمرومو بیر جوره گئچیردم. گله جه ییمه اوقدر اومودلو دئییلم.

دئمیرم دولتی ایشیم اولماسا آج قالارام، منیم اؤزومون الیمده ایشیم وار. آما بو ایشدن اوقدر گلیر گتیره بیلمرم کی بیر عایله نین ایلکین احتیاجلارینی اؤده یه بیلم. بیر یاندان دا اؤزوم ده راضی لاشسام، آتا آنام راضی اولماز من بو ایشه دوام وئرم.

آنجاق فیکریم بو دو کی عسگرلییمی بیر جوره بیتیرم گؤرم باشیما نه گلیر.

بلکه بیر آز پول اله گئچیردیم و بیر باش گئدیم آمریکایا. آخی بونو یاخجی بیلیرم اورا گئدن قاییتماز. یانی اوردا نه قدر آج دا قالاسان بوردان یاخجی دیر.

ایندی بیر منم بیر ده باشیم.

یولداشلاریم دا ائله منیم کیمی دیلر. بیر یولداشیم وار 31 یاشی وار. 1 ایل بیر دولت ایشده قراردادی ایشلیر. آما نئچه واقت اولار پرونده سی آچیلیب و اونو ایشدن دیشاری سالیرلار. بیلیرسیز اونون بلکه گوناهی بو ایدی کی منیمله دولانیردی!!!!!!!!!!!

دوزون ایسته سز آرزولاریم قورتاریب دی. هئچ نه آرزوم یوخدو. ایستیرم ائوله نم، چونکو آتا آنامین آرزوسودو و بیر ده بو کی من ائولنمه سم بیر قیز ییقین ائوسیز قالاجاق. اصلا اؤزومه آرزو یوخومدو. آیریلارین آرزوسونو یئرینه یئتیرمک اوچون چالیشیرام. بیر تک آرزو کی واریمدی میللتیمین اؤزگورلوغودور. بیر بونا اورح دن چالیشیرام.

هردن فیکیلشیرم ییقین بو دونیادا منه تای بیر قیز تاپیلار کی آرزوسوز اولسون.و مندن هئچ نه ایسته یی اولماسین. ییقین من چوخ بئیار اوغلانام کی بئلنچی بیر قیز آختاریرام. منیم بیر چاییم اولسون بیر ده یاوان  بیرچؤرک و بیرده بالاجا یاتاجاق بیر دامیم. بونلار منی گؤرر. بیرده شعر کیتابلاری. بونلارا راضیلاشان بیر قیز اولسایدی من دونیانین ان موتلو اوغلانی سانیلاردیم. ییقین ایندی فیکیرلشیرسیز بو نئجه بئکار آدام دی کی دوروب سؤزلرینی تایپ ائلیر، ییقین بو سؤزلر اونا چوخ اؤنملی دیر.... آما بونو دئیم کی من ائله دوغوردان بئکارام و ایندی بو ساعات عسگرلیک آنلاریمی سورورم. بونلاری ایندی تایپ ائلیرم آخشام کافی نئته گئدیب اونلاری وئب صحیفه مه تاپشیرام.

بلکه ده هئچ کیم بونلاری بیر یول دا اوخوماسین. آما بونا امینم کی بیر گون بونلاری اؤزوم اوخویاجاغام. ائله جه، من تکجه اؤزومدن اؤترو یازیرام. من ایندی بیر اوتاقدایام کی 4 کیشی ده واردی. 3 او منیم کیمی عسگر دی آما بیری بوردا ایشلر. بوگون منی یوللادی گلیر فیشینی آلام. کاغاذین قیراغیندان باخدیم بیر میلیون آلتمیش مین تومن آیلیق گلیریدی. هئچ اونا گیجیح لنمه دیم. چونکو آلله هر آدامین چؤره یین وئرن دیر.

بیلیرم منیم ائله گلیریم اولاسایدی آپاریب وئرردیم یازی چی لارا، کیتابلارن چاپ ائله سینلر. یای سینلار آداملار اوخوسونلار. آما یوخومدو دااااااااا. هردن دئییرم یوخومدو یاخجی دی، فیکریمده آزدی...

یوخون بیر فیکیری وار کی، یوخودو. آما وارین مین ده نه فیکیری وار.... هه ائله فیکیر ائله مه یین کی اؤزومه توختاقلیق وئریرم.... بلکه ده نه بیلیم بونلار هامیسی توختاقلیق دیر....

اللها شوکورلر نوخوش زاد دئییلم و بودا منه چوخدی. هله چوخدا گؤزلم.گؤزلریم ایری و آلا دی. هر کسی حیران ائلر. بوگون بیر کیشی بوردا منی ماچ ائله دی. دئدی سنی قارداش کیمی ماچ ائله دیم نه لذتی اوجون. هله بیر اغلان دا وار ایدی بیزیم اوتاقدا اولمازدی ، اما من هرگون اونو سحر یوخودان دوراندا سالوندا گؤرردیم. بیر گون من اعتیراف ائله دی من هر گون تئز یوخودان دورورام کی سحرلر سنی گؤزلرینه باخام. آخی یوخودان دوراندا گؤزلرین چوخ گؤزل اولور.... یاخجی دا بوندان آرتیق اؤزومدن تعریف له مه ییم  و سیزین جینسی غریزه لریزی تحریک ئله مه ییم .بیردن دروب گلرسیز منی تاپارسیز.

 

 

 

 

 

من عسگر اولان دایره ده بیر کیشی وار. بو کیشی مندن 3 یاش گئنج اولسادا 5 ایل اولار ائوله نیبدیر. من بیلن قادینیسی شهر شوراسینین قیزی دیر. منیم فارسجا دانیشماغیمدا بیر آغیر لهجه اولدوغونا گؤره

 بو کیشی ایلک  منیمله دانیشاندا سوروشدو سن هارا تورکوسن. من ده دئدیم تبریزلی، دئدی اورالار دا هامی تورک اولورلار. منده دئدیم بعلی. اوردا هامی تورک دورلر. بیرده سوروشدو همدان نئجه اونلاردا تورک دورلر. من دئدیم همدانین اوست طرفلری تورک اولورلار آما آشاغیلاری لور. مثلا باهارلی لار تورک دورلر آما ملایر لور دی. یا مثلا رزن تورک دور، کبودرآهنگ تورک دور. او دئدی اسد آباد نئجه. منده دئدیم اورا دا تورک دور. آما کوردو ده وار. او چوخ سئویندی. دئدی من اسد آبادلی یام. دئدیم اوندا سن تورک سن دا، سؤزونون قالانینی دا تورکجه دانیشدی. اؤنجه اونو تورک ساندییغیما امین اولاندان سونرا تورکجه دانیشدی.

یانی اونلار تورک اولدوقلارینا امین اولسالاردا، بیز اونلاری تورک سانماغیمیزا او قدر امین دئییل لر.

چوخ سئویرم بیر شئیلر یازام، آما یازماغا قونو( موضوع) تاپا بیلمیرم.

دونن آخشام ، یوخ دونن ناهاردان سورا ساعات 4 ده ایشدن چیخدیم. استادیوم دا ماچ وار ایدی. آزربایجانین گسترش فولاد تاخیمی و تهرانین پیروزی تاخیمینین آراسیندا. اورا گئتمک نیتی واریم ایدی.

یانیمجا بیر اوغلان دا وار ایدی. بو اوغلان یاخجی اوغلاندی، قاشقای تورکلریندن دی. بیر آی اولماز اونونلا تانیش اولوب و یولداشلیق ائلیرم. چوخ دوغال( طبیعی) اولاراق، آسیمیلاسیون سیاستی سونوجوندا اؤز کیملیین ایتیرمیش حالا چاتمیش کیمی دی. بو قیسسا زاماندا اونونلا کیملیک حاققیندا آ ز، ماز دانیشمیشام. هله اونو اؤزلویو ایله تانیش ائتمک اوچون تهرانین کیتاب سرگیسیندن اونا قاشقای تورکجه سینده بیر کیتاب دا آلمیشام. آز ماز مازاقلانیب. بو دؤنه حسن راشیدی جنابلارینین یازدیغی ترکهای ایران آدلی کیتابی دا اونا آلماق قرارینا گلمیشم.

تکجه من دئیلم اونا تورکجه نی اؤیردن. مندن قاباق دا بیر تبریزلی اوغلان دا اونا بیر آز دانیشمیشدی. تورکچولوکدن بیر شی لر بیلسه ده یاخشی جا منیمسه یه بیلمه یب دیر.

بیر سؤزو اوندان اؤیرنمیشم. " شاییق"

هله سیزه ماچ دان دانیشیردیم و اونونلا ایلگیلی اولان بو قاشقای اوغلاندان . دئدیغیم کیمی آسیمیلاسیون سیاستی ائتگی سی آلتیندا، بو اوغلان پیروزی تاخیمیمین یانداشی اولموشدور.  شوخلوقجا اونا دئدیم کی سن نئجه تورک سن کی تورکلرین گسترش فولاد تاخیمی هئچ، تراختور کیمی بیر بؤیوک تاخیمینی یئرده قویوب و پیروزی یانداشی اولموسان؟ اودا دئدی کی ورزش له سیاستین هئچ بیر ایلگی سی یوخدور، من اوشاخلیقدان بری پیروزی تاخیمینین یانداشیام.

من باشا دوشمورم بیر آدام نیه بیر تاخیمین یانداشی اولور.( من توپا باخان دئییلم، بلکه ده بوندان دی کی بئله بیر زادلاری باشا دوشمورم)

سیزه ماچ دان دانیشیم. ماچ ساعات 6 دا باشلایاجاق ایدی. من ایندیه دک فوتبال ماچینا استادیومدان باخمامیشدیم. بو بیرینجی دؤنه ایدی کی ماچا گئدیردیم. استادیومون قاپیسیندا بیر بیریمیزدن آیریلدیق.

من گئتدیم گسترش فولاد یانداشلاری اولان گیریش یئرینه. آجان لار قاپینی باغلامیشدیلار و کیمسه نی ایچه ریه بیراخمیردیلار. آما پیروزونون یاناداشلارینین قاباغی آلینمیردی. بیر آز دایاندیق قاپیدا، چوخالاندان سونرا دا بیزی ساخلایا بیلمه ییب و گیردیک ایچه ریه.

چوخ ماراقلی و هیجان دولو ایدی. چوخلاری ماچا باخمیردیلار. منده هئچ ماچا باخماغا ماجال تاپانمادیم. گیرندن چئشیدلی شوعارلار وئریردیک.( بیزدن قاباقدا اوردا تاماشاچیلار شوعار وئریردیلر یز ده قاتیلدیق اونلارا)

سونوندا یادیما دوشدو هئچ بو صحنه لردن رسیم چکمه میشم.

بونا باخمایاراق کی ماچی اودوزدوق آنجاق من و او بیری یانداشلار وئردیغی شوعارلارا گؤره چوخ سئوینجک ایدیک.

یا یا یا شا شا شا  آزربایجان چوخ یاشا

یاشاسین آزربایجان

آزربایجان وار اولسون، ایسته مه ین کور اولسن.

آند اولا ستارخانا، قان سالاریق تهرانا

و فارسلارین یامان لارینین قارشیسیندا دا چئشیدلی و گولمه لی شوعارلار دئییلیردی

مثلا

خلیج عربی هی هی خلیج عربی....

تراختور هارداسان، پرسپولیسه با.....سان

تراختو کجایی پرسپولیسو .....

فارس سگ....

افغانی

هاردا گؤردون فارس توت گؤ...... باس

هردن ده بیر آز آداملاردان علی دایی، پیروزی تاخیمینین کوچونا دا توخونوردولار. آما اونلارین شوعارلارینا هامی قاتیلمیردی

علی داییا توخونان شوعارلاردان:

کمالوند هارداسان، دایی نی دومبالداسان

داش باشینا بی غیرت( البته بونو پیروزویا یانداشلیق ائدن تورک لره ده دئییردیلر.)

هردن آجانلاردان نئچه سی تاماشاچیلاری آراسینا گیریب و بیرینی هده له ینده هامی بیر سسله دئییردیلر" باس ائشیه، باس ائشیه"

قول یئیینده هامی بیر سسله عیبی یوخ دئییدیلر.

ماچین بیر بؤلومونده گسترشین قولی بانین، داور ایخراج ائله دی. فیکر ائلیرم او زاماندایدی کی تاماشاچیلار داوره پول گؤرستدیلر.

 

 

 

 

 

آواوا

بیزیم آیین (اسطوره) لاریمیز چوخدولار. ایشله تدییمیز هر بیر سؤجکوده اقیانوسلارجا سیر واردیر. " آواوا" کیتابین یازانی اوستاد ناصر منظوری جینابلاریدیلار. بو بایرام اللها شوکورلر بیر آز واقتیم آچیق اولدو و ائلیه بیلدیم اونون بو کیتابینی دا اوخویا بیلم. بوندان قاباق اوستاددان "قاراچوخا" آدلی کیتابی اوخوموشدوم. اونا گؤره چوخ ماراقلی ایدیم اونون" آواوا" کیتابینی دا اوخویام. بونو دا دئییم کی اوستادین آیری آیری موصاحیبه لرین ویازدیغی مقاله لرین، درگیلرده اوخویوب ایزلردیم.

 

اگر کیتابینی اوخومامیسیز، اؤنجه اونون سیرلی آدی" آواوا" سیزین ماراقینیزی دوغوراجاقدیر( البته اگر اوستادین یازدیغی آیری یازلارینی دا اوخوسایدیز بو ماراق مین قات چوخ اولاجاق ایدی)

آواوا همن بیر آواز دیر آغیزدان چیخار بئله کی الینیزی تئز تئز آغزیزا ووروب چکرسیز و عینی زاماندا آردیجیل سس آغزیزدان چیخیر. کیتابی یولداشلاریمین بیرینه وئرمیشم اوخوسون یوخسا کیتابین یازدیغی کیمی بوردا یازسایدیم راحات بیلردیز آواوا نه دیر.

قیسساجا بو کیتاب ایستیر بیزی  ، گیزلین آیین لاریمیزلا تانیش ائله سین.

 

یالقیزاق قورد

سونای

سورگونه گئتمک

آد قازانماق

آی

...

قولی لی، قولی لی

چوخ چوخ سؤزلر

 

بو کیتابی اوخوساز، سیزه حایاتا بیر یئنی پنجره آچاجاقدیر. چوخ سئوگی و محبت له دولو بیر پنجره. گؤره جک سیز کی نئچه ظالیمجه سینه دانیشدیغیز سؤزلره دیققت یئتیرمه ییب و اونلارین سیرری لارینی دا آختارمیرسیز.

 

من آنامدان  آتاملا نئجه تانیش اولدوغونو و بئله دئمک ایلک گؤروشونو مین دؤنه دن آرتیق سوروشموشام، اوقدر کی اوندان یاخجی دئیه بیلرم نئجه تانیش اولوبلار. آنجاق بیر سؤزه اصلا دیققت یئتیرمه میشدیم.

آنام دئیردی

سون آی گئجه سینده آیین ایشیغی سوت کیمی یایلمیشدی. من حیط ده قابلاری یوواندا گؤردوم آغاجلارین دیبیندن سس گلیر....

باخین او ایکی اوسطوره وی سؤزجوکلریمیز: سونای و آی

ییقین باش تاپمایاجاقسیز هاردان دانیشیرام. کیتابی حتما اوخویون.

ایندی من فیکر ائلیرم یالقوزاق بیر قورد ام من.

بو کیتابی اوخودوم هومای قیزین خودویو منیم لاب اوره ییمی شیشیرتدی

گئجه لریز خیره قالسین

 

بیر اوغلان وار آدی ممد دی. نئچه واختدی منه یامان قمیش اولوب. بو اوغلان ایستیر گئتسین تورکیه ده تحصیلاتینا دوام وئرسین. آنجاق ریاضیات درسینده چوخ  ضعیف اولدوغونا مندن ایسته میشدی اونا یاردیم ائدم. یاردیم ائدردیم ها، آنجاق اونون چوخ ضعیف اولدوغونا گؤره، دئمیشدیم گئتسین بیر آیری آدام کی واقتی و حوصله سی مندن چوخدو گؤرسون. مندن دئمک و اوندان ائشیتمه مک. آخیر ناچار قالدیم بیر نئچه واقت عسکرلیه یوللاناناجان اونونلا ریاضیات ایشله یم. نظره آلین بیر آدام کی بیلمیر 9-4 نئچه اولار، مندن ایستیر اونا چتین چتین انتگرال لار حل ائدم. اونا نئچه باش دئمیشتیم بو خمیر چوخ سو آپاراندی. آنجاق ائشیدن قولاغی یوخ ایدی. بیر آی یاریم هر گون ایسته دی، گلدیم کیلاسا. نه قدر چوخ دئدیم آز باشا دوشدو. نهایت گئتدیم عسکرلیه یاخام قورتاردی. دوزون ایسته سز راضی ایدیم 1 میلیون دا جیبیمدن وئرم مندن ال چکسین. کیمدن خواهیش ائله میشدم اونونلا ریاضیات ایشله یه، بیر ساعات دوام وئره بیلمه میشدی. عسکرلیه گئتدیم. اؤزوز یاخجی بیلیرسیز عسکرلیک بوردا یانی واقت اؤلدورمک. یانی روحو خسته لیک. یانی ایسته مه دن ....

آما بو اوغلان یئنه ال چکن دئییل. سانکی بیلیرمیش بایرامدا بیزه نئچه گون ترخیص وئره جکلر. اون گوندو منیم گلمه ییمی گؤزلور. آنام دئییر هر گون زنگ آچیر و سنی خبر آلیر. اللها شوکورلر بیر نفر ده منیم یولومو گؤزلو ین وار. دونن گلمیشم 4 گون سونرا گئده جم. بو گون آخشام گئینه منی تاپدی و بیر بول سوال.....

آلله کؤمه ییم اولسون. بیلمیرم هارا قاچیم... بیلمیرم اونو نئجه باشا سالیم کی آی بالا سنین دردین باشقا منیم دردیم باشقا.... ائله روحو خسته لیک توتموشام کی کیمسه نی گؤرمک ایسته میرم. آما بیم ال چکیر.... بیر ساعاتلیق تک لیک اختاریرام تاپا بیلمیرم. کاش قالاردیم عسکر خانادا گلمزدیم هئچ..... بایرام آخشامی حالیم چوخ پوزوق دو.....

هامینیزا بایرامی تبریک ائدیرم......

اومودوم  وار سیزن کئفیز باری ساز اولسون.

 

 

سلاملار و سایغی لار

نئجه سن سایین اوخوجو. بو منیم۱۳ اونجو گونوم عسکرلیک دن.

هئچ نه یه داریخمادیم، تکجه یازماغا داریخدیم. بیر قلم، بیرکاغاذ، بیر ساعات دینجلییه حسرت قالدیم.

یاشا یاشا یاشا منیم خالقیم.

عسکرخانایا پان تورکیسمه محکوم اولمویوم دئیه بیر ده نه ده تورکجه کیتاب آپارا بیلمه دیم.

داریخیرام یازماغا، اوخوماغا

شعره چوخ داریخیرام.

اوزوم قاراسی گؤزلرین، اؤلدورور منی

قورشون یاراسی سؤزلرین، سوروندورور منی

داریخیرام فاتیح قیسسا بارماغین سسینه

حاساد واقتی حارماندا

قیزغین گونش آلتیندا

گیزلی سئودا ایچردیک

گتیردیی آیراندا

آیران ایچدیک

آیری دوشدوک

آیران گؤنوللو یاریم

 

 

 

من کئدمیرم ها

منی زورلا آپاریرلار

منی عسکر آپاریرلار

 

 

 

 

بو گئجه من بیر یولداشا اؤزگه له شیلدیم.

دوغوردان اؤزگه نه دئمک دیر؟

اؤزل، اؤزوم، اؤزگه

نه قدر " گه " فرق لندیریر آنلامی. من اؤز اولماق ایستیرم، اؤزگه اولماق ایسته میرم. اؤزگه لشیلماق دا اؤزوم ایسته مه دن ایسته میرم. اؤزل بیر اؤزلمله اؤزله یه جم اؤزونو. اؤزو اؤزونه منی اؤزگه له شدیرسه ده

یئنه ده  منه اؤزل دیر اؤز قالاجاق دیر.

 

اوزوم قاراسی گؤزلرین اؤلدورور منی

قورشون یاراسی سؤزلرین سوروندورر منی

 

ایندی میشوو داغیندان دا قارگلسه اورییمی سویوتماز